پاک بحریہ کے سربراہ نے نیدرلینڈز کا دورہ اور اعلیٰ عسکری قیادت سے ملاقاتیں کیں

ترجمان پاک بحریہ کے مطابق چیف آف دی نیول اسٹاف ایڈمرل نوید اشرف نے سرکاری دورے کے دوران نیدرلینڈز کی ملٹری اور نیول لیڈر شپ سے ملاقاتیں کیں۔نیول چیف نے وزارت دفاع میں؛ ملٹری اور نیول لیڈرشپ سے مشترکہ ملاقات میں دوطرفہ دفاعی تعاون سمیت باہمی دلچسپی کے پیشہ ورانہ امور پر تبادلہ خیال کیا ۔

نیول چیف نے مشقوں اور تربیتی تبادلے کے پروگراموں کے ذریعے دونوں ممالک کی مسلح افواج کے درمیان رابطوں کو بڑھانے کی اہمیت پر زور دیا۔نیدر لینڈز کے ڈپٹی چیف آف ڈیفنس، وائس ایڈمرل بوڈیوجن بوٹس(Vice Admiral Boudewijin Boots )نے مختلف شعبوں میں مضبوط دوطرفہ فوجی تعاون کی اہمیت کو تسلیم کرتے ہوئے،دفاعی شعبے میں مزید تعاون بڑھانے پر زور دیا۔

 ایڈمرل نوید اشرف نے رائل نیدرلینڈز نیوی کے ہیڈکوارٹرز کا دورہ بھی کیا اور کمانڈر رائل نیدرلینڈز نیوی، وائس ایڈمرل رینے تاس (Vice Admiral René Tas) سے ملاقات کی. ملاقات میں باہمی دفاعی تعلقات، دوطرفہ بحری تعاون اور علاقائی میری ٹائم سیکیورٹی پر تبادلہ خیال کیا۔

نیول چیف نے ریجنل میری ٹائم سیکیورٹی پیٹرولز (RMSP) کے اقدام اور کمبائنڈ میری ٹائم فورسز میں شرکت کے ذریعے علاقائی میری ٹائم امن و استحکام میں پاک بحریہ کے کردار کو اجاگر کیا۔بعد ازاں؛ چیف آف دی نیول اسٹاف ایڈمرل نوید اشرف نے ڈیمن شپ یارڈ اور رائل نیدرلینڈز نیوی کے زیون ڈی پرونسئن کلاس فریگیٹ (Zeven De Provincién Class Frigate) کا دورہ کیا جہاں انہیں جہازوں کی مرمت اور تعمیراتی سرگرمیوں کے بارے میں تفصیلی بریفنگ دی گئی۔

نیول چیف کے دورہ نیدرلینڈز سے دونوں ممالک کے درمیان بالعموم اور بحری افواج کے درمیان بالخصوص دفاعی تعلقات میں مزید اضافہ ہوگا۔