ایرانی عدلیہ کی میزان نیوز ایجنسی نے رپورٹ کیا کہ روس کو میزائلوں کی منتقلی اور نئی پابندیاں عائد ہونے کے بعد، ایران کی وزارت خارجہ نے جمعرات کو برطانوی، فرانسیسی، جرمن اور ڈچ سفارت خانوں کے سربراہوں کو طلب کیا۔

امریکی وزیر خارجہ انٹنی بلنکن نے منگل کے روز کہا کہ روس نے ایران سے بیلسٹک میزائل حاصل کیے ہیں اور امکان ہے کہ روس ان ہتھیاروں کو آئندہ ہفتوں کے دوران یوکرین میں اپنی جنگ میں استعمال کرے گا۔

امریکہ، برطانیہ، جرمنی اور فرانس نے بھی ایران پر نئی پابندیوں کا اعلان کیا، جس میں اس کی قومی ایئر لائن ایران ایئر کے خلاف اقدامات بھی شامل ہیں۔

کریملن نے بلنکن کے بیان کے بعد کہا کہ یہ دعوے بے بنیاد ہیں۔ ایران نے کہا کہ روس کو میزائل کی منتقلی سے متعلق بیانات "جھوٹے اور گمراہ کن” تھے اور نئی پابندیوں کی مذمت کی، جن میں تین یورپی ریاستوں کی طرف سے دو طرفہ فضائی خدمات کے معاہدوں کی منسوخی بھی شامل ہے۔

"یوکرین کے تنازع میں [ایرانی] مداخلت کا جھوٹا دعویٰ کرنے اور اسلامی جمہوریہ پر پابندیاں عائد کرنے کے امریکہ کے ساتھ منسلک بعض یورپی ملکوں کے غیر تعمیری بیانات کے تسلسل کے بعد، برطانیہ، فرانس، نیدرلینڈز اور جرمنی کے سفارتخانوں کے سربراہان کو وزارت خارجہ میں طلب کیا گیا” میزان نیوزایجنسی نے رپورٹ کیا۔

لندن میں ایران کے سینئر ترین سفارت کار کو بدھ کے روز برطانیہ کی وزارت خارجہ نے طلب کیا تھا۔ ہالینڈ میں ایران کے سفیر کو ہالینڈ کی وزارت خارجہ نے طلب کیا۔