اسرائیل نے لبنان پر فضائی بمباری شروع کردی

اسرائیلی فوج نے  جمعرات کو کہا کہ وہ لبنان میں حزب اللہ کے ٹھکانوں پر حملہ کر رہی ہے، یہ اعلان تحریک کے سربراہ کی تقریر سے کچھ وقت پہلے سامنے آیا۔
اسرائیلی فوج  نے یہ بھی کہا کہ ملٹری چیف آف اسٹاف نے اسرائیل کے شمال کے لیے منصوبوں کی منظوری دی ہے، جس کی سرحد لبنان سے ملتی ہے۔
فوج کا کہنا ہے کہ حزب اللہ نے جنوبی لبنان کو ایک جنگی علاقے میں تبدیل کر دیا ہے۔
اسرائیلی فوج نے کہا، "کئی دہائیوں سے، حزب اللہ نے شہریوں کے گھروں کو ہتھیار بنایا ہے، ان کے نیچے سرنگیں کھودی ہیں، اور شہریوں کو انسانی ڈھال کے طور پر استعمال کیا ہے۔”
اسرائیلی فوج نے کہا، "آئی ڈی ایف (اسرائیل ڈیفنس فورسز) شمالی اسرائیل میں سیکورٹی لانے کے لیے کام کر رہی ہے تاکہ رہائشیوں کی ان کے گھروں کو واپسی کے ساتھ ساتھ تمام جنگی اہداف کو حاصل کیا جا سکے۔”
ایک الگ فوجی بیان میں کہا گیا ہے کہ چیف آف جنرل سٹاف، لیفٹیننٹ جنرل ہرزی حلوی نے حال ہی میں شمالی میدان کے لیے منصوبوں کی منظوری مکمل کی ہے۔
یہ بیانات حزب اللہ کے رہنما سید حسن نصر اللہ کے پہلی بار تقریر کرنے سے چند منٹ قبل جاری کیے گئے  جب کہ ایران کے حمایت یافتہ لبنانی گروپ کو بوبی ٹریپ ریڈیوز اور پیجرز دھماکوں کے  ساتھ نشانہ بنایا گیا۔
حزب اللہ کے مواصلاتی آلات پر ہونے والے حملوں میں 37 افراد ہلاک اور 3,000 کے قریب زخمی ہوئے، جس سے یہ خدشہ پیدا ہوا کہ ایک مکمل جنگ ہونے والی ہے۔
اسرائیل نے ان حملوں کے پیچھے ہاتھ ہونے کی نہ تو تصدیق کی ہے اور نہ ہی تردید کی ہے لیکن متعدد سیکیورٹی ذرائع نے کہا ہے کہ یہ اس کی جاسوسی ایجنسی موساد نے کیے ہیں۔